ئه‌مه چیرۆك و سه‌رگوزه‌شته‌ی یه‌كێكه له‌و ئافره‌تانه‌ی كه نێچیر و قوربانی ئه‌م جۆره هاورِێتی و په‌یمانه سۆزدارییه‌ی ئه‌م سه‌رده‌مه‌یه ، كه به هه‌موو توانایه‌وه ده‌نگ هه‌ڵ ده‌برِێ و هاورِه‌گه‌زه‌كانی خۆی ئاگادار ئه‌كاته‌وه له په‌یمانی پرِ درۆی كورِان .
بۆ ئه‌وه‌ی نه‌وه‌كو ئه‌و به سه‌رهات و تاوانانه‌ی كه تووشی خۆی بووه ، تووشی یه‌كێكی تر بێ و دوا رِۆژی وه‌كو ئه‌م بسووتێ ، به‌م شێوه‌یه‌ی لای خواره‌وه چیرۆك و به‌سه‌رهاتی خۆیمان بۆ ده‌گێرِێته‌وه و ئه‌ڵێ *:
رِوَژێك له رِوَژه‌كانی ساڵی خوێندنم بوو له ده‌روازه‌ی زانكۆ هاتمه ده‌ره‌وه بینیم كورِێك له به‌ر ده‌رگای زانكۆ ، به‌رامبه‌رم رِاوه‌ستاوه ئه‌م كورِه رِوخسارێكی رِێك و پێك و جل و به‌رگێكی پاك و جوانی له به‌ردابوو ، به چه‌شنێك سه‌یری ده‌كردم وه‌ك بڵێ ی ده‌مناسی ، به‌ڵام من هیچ بایه‌خێكم پێ نه‌دا ، پاشان دوام كه‌وت و ده‌ستی كرده قسه وه‌شاندن به‌ده‌نگێكی نزم و له سه‌رخوَ به چه‌ند ووشه‌یه‌كی مناڵانه و تازه پێ گه‌یشتوانه له دوامه‌وه قسه‌ی ده‌وه‌شاند وه‌ك : ( ئه‌ی جوانكیله من ته‌نها توَ شك ئه‌به‌م !! ئه‌مه‌وی ببی به هاوسه‌رم !! ده‌تخوازم !! من چاودێریت ده‌كه‌م رِه‌فتار و رِه‌وشتی توَ شاره‌زابووم !! ) . منیش له ئه‌نجامی ئه‌م رِه‌فتاره مناڵانه‌ی كورِه ، و ئه‌م قسه هیچانه‌ی به‌په‌له كه‌وتمه‌رِی ، بـــه چه‌شنێك ده‌رِوَیشتم لـــه كاتی رِێكردندا قــاچه‌كانم بــه یه‌كدا ده‌چــوون و ( چین چین یان چۆرِ چۆرِ ) ئاره‌ق به نێو چه‌وانمه‌وه دا ده‌چۆرِا ، چونكه یه‌كه‌م جارم بوو تووشی ئه‌م جوَره هه‌ڵوێستانه‌بم ، به هه‌رچه‌شنێك بێت به ماندوو بونێكی زۆر و دڵه خورپه‌وه گه‌شتمه ماڵه‌وه ، ته‌نها بیرم له‌م به‌سه‌رهاته‌ی ئه‌مرِوَم ده‌كرده‌وه ، ئه‌و شه‌وه‌ش له‌ترس و دڵه‌رِاوكێدا خه‌و له چاوانم تۆرا و نه‌متوانی بخه‌وم ، رِۆژی داهاتوو به‌هه‌مان شێوه له كاتی ده‌رچوونم له ده‌روازه‌ی زانكۆ ، بینم لێو به خه‌نده به‌رامبه‌رم رِاوه‌ستاوه ، به‌م شێوه‌یه رِاوه‌ستان و رِێكردن له پاشمه‌وه و قسه وه‌شاندنی مناڵانه رِۆژ له دوای رِۆژ درێژه‌ی ده‌كێشا هه‌موو رِۆژێ ، هه‌موو ئه‌م كردارانه كۆتایی هات به نامه‌یه‌كی بچوك كه له به‌ر ده‌رگای ماڵی ئێمه فرِێی دابوو كه نامه‌كه‌م بینی جاری یه‌كه‌م نه‌متوانی هه‌ڵی گرم ، به‌ڵام هه‌ر چۆنێك بێت توانیم نامه‌كه هه‌ڵگرم . له‌و ساته‌دا ده‌سته‌كانم له ترسانا هه‌ڵده‌له‌رزین ده‌سته‌كانم له ترسانا بوو بوونه ده‌ستی ئافره‌تێكی به ساڵا چوو كه نه‌توانێ پارچه كاغه‌زێك هه‌ڵگرێ و ده‌ستی بله‌رزێ . نامه‌كه‌م كرده‌وه‌و خوێندمه‌وه پرِبوو له ووشه‌ی ( سۆز !! ) و ( ئه‌وین داری !!! ) و داوای لێبوردن كردن به‌هۆی ئه‌و رِه‌فتارانه‌ی كه رِۆژانه ئه‌نجامی داوه ، و بوونه‌ته هۆی بێزاركردنی من ، و وه‌رِه‌ز بوونم .
پارچه كاغه‌زه‌كه‌م درِاند و پاش چه‌ند ساتێك زه‌نگی ته‌له‌فۆنه‌كه لیی دا هه‌ڵمگرت ، هه‌مان ئه‌و كورِه‌ی هه‌موو رِۆژێ به ووشه‌ی سۆزداری دوام ئه‌كه‌وێ وا ئێستا له ته‌له‌فۆندا پێم ئه‌ڵێ : نامه‌كه‌ت خوێنده‌وه یان نه‌ت خوێنده‌وه پێم ووت ئه‌گه‌ر ماڵه‌وه‌مان ، یان كه‌سوكاره‌كه‌م ئاگادار كه‌مه‌وه ئه‌و جا وای به حاڵت ، له پاش یه‌ك سه‌عات جارێكی تر ته‌له‌فۆنی كرده‌وه ، و هه‌وڵی ئه‌وه بوو كه خۆی خۆشه‌ویست كات له‌لام ، به‌وه‌ی كه مه‌به‌سته‌كانی پاك !! و بێگه‌ردن !!! و دوورن له درۆ و فێڵ و هه‌ڵخه‌ڵه‌تاندن !!!! و ئه‌یه‌وێ جێگربێ و ژن بهێنێ !!! وه زۆر ده‌وڵه‌مه‌نده و كۆشكێكم بۆ دروست ده‌كات !!! و هه‌موو ئاواته‌كانم دێنێته‌دی !!! وه له هه‌موو ئه‌ندامانی خێزانه‌كه‌ی خۆی به ته‌نها ماوه‌ته‌وه وه... وه... وه... هتد ، له‌و كاته‌دا به‌رامبه‌ر به‌م كورِه منیش دڵم نه‌رم بوو جۆرێك له به‌زه‌یی هاتنه‌وه و خۆشه‌ویستی به‌رامبه‌ر به‌و كورِه له دڵما دروست بوو ، وام لێهات نامه‌م بۆ ده‌نووسی هه‌موو ساتێك چاوه‌رِوانی ته‌له‌فون كردنی كورِه بووم .
پاش ئه‌وه‌ی له كاتی ده‌رچوونم له زانكۆ چاوم بۆ كورِه ده‌گێرِا !!! به‌ڵكو چاوم پێ بكه‌وێ و بیبینم به‌ڵام بێ هوده بوو ، كه‌چی رِۆژێكیان كه له زانكۆ هاتمه ده‌ره‌وه ، بینیم به‌رامبه‌رم رِاوه‌ستاوه ، به‌و بینینه وه‌خت بوو له خۆشیانا بفرِم !!!! پاشان وای لێهات له‌گه‌ڵیا به سه‌یاره‌كه‌ی ده‌ر ئه‌چووم بۆ پیاسه‌كردن و هه‌موو كون و كه‌له‌به‌ری ئه‌م شاره ده‌گه‌رِاین ، كه له‌گه‌ڵیا ده‌بووم وام هه‌ست ده‌كرد كه توانای بیر كردنه‌وه‌م نه‌ماوه وه‌ك بڵێی مێشكی له جه‌سته‌م ده‌رهێنابێ ، باوه‌رِم به قسه‌كانی ده‌هێنا و متمانه‌م پێ ی بوو !! به تایبه‌تی كاتێك ده‌یووت تۆ ته‌نها هی منی !!! و له دوا رِۆژ دا له یه‌ك ماڵدا ده‌ژین له یه‌ك خانوو دا ژیان به سه‌ر ئه‌به‌ین !!! كاتێك كه ده‌یوت تۆ شازاده جوانه‌كه‌ی منی وه‌خت بوو له خۆشیانا بفرِم !!! وه ئه‌و كاتانه‌ی ووشه‌ی سۆزداریم لی ده‌بیست وام هه‌ست ده‌كرد له خۆشییه‌ك دا ده‌ژیم جگه له من كه‌سی تر نییه‌تی ، به‌ڵام له یه‌كێك له رِۆژه‌كاندا چ رِۆژێك بوو رِۆژێكی رِه‌ش ، هه‌موو ژیانی تێكشكاندم ئاره‌زوه‌كانی له بیر بردمه‌وه خۆشترین رِۆژه‌كانی ژیانم بیر چووه‌وه ، و دوا رِۆژی سوتاندم ، رِۆژێك بوو به‌ره‌و چه‌شتنی تالڕ ترین ئازار رِاپێچی كردم ، له پێش چاوی هه‌موو خه‌ڵكی شه‌ره‌فی شكاندم و قیزه‌ونی كردم .
رِۆژێك بوو وه‌ك رِۆژه‌كانی تر له‌گه‌ڵیا بۆ پیاسه كردن ده‌رچووم ، بـه‌ڵام ئه‌مجاره‌یان له‌گه‌ڵ خۆیا بردمی بۆ یه‌كێك له خانووه ئاماده‌كراوه‌كان ، چووینه ژووره‌وه و به ته‌نهایی پێكه‌وه دانیشتین من و ئه‌و كه‌سی سێ یه‌ممان ته‌نها شه‌یتان بوو ، له‌و ساته وه‌خته دا ئه‌و فه‌رمووده‌یه‌م بیر چوو كه پێغه‌مبه‌ری خوا (صلى الله علية ه وسلم) فه‌رموبووی : " لا يخلون رجل بامرأة إلا كان الشيطان ثالثها "( صححه العلامة الألباني في السلسلة الصحيحة :1/792 ، برقم :430 ) .
واته : هه‌رگیز پیاوێك له گه‌ل ئافره‌تێكدا به ته‌نها نابن ، ئیللا شه‌یتان سێ یه‌میان ده‌بێت .
به هیچ شێوه‌یه‌ك بیرم لای ئه‌م فه‌رمووده‌یه نه‌بوو ، به‌ڵام ئه‌م جاره‌یان شه‌یتان دڵی داگیر كردم و پرِی كرد له ووته و ووشه‌ی ئه‌م كورِه لاوه ، دانیشتین و یه‌ك بۆ یه‌ك ده‌مانرِوانییه یه‌كتر و نیگامان ده‌گۆرِییه‌وه . به‌م شێوه‌یه به بێ ئه‌وه‌ی به خۆم بزانم بووم به نێچیری ئه‌م كورِه ئه‌وه‌ی خوا پێ ی خۆش نه‌بێ پێ كردم ، ئه‌و رِه‌فتاره ناشایسته‌یه له نێوانماندا ئه‌نجام دراو ، گرانبه‌هاترین سامانی ژیانمم له ده‌ست دا به چه‌شنێك هه‌تا هه‌تایه ده‌ستم ناكه‌وێته‌وه . وه‌كو شێت هه‌ستام و پێم ووت : چیت پێ كردم ؟!! چیت ؟!! چیت به‌سه‌ر هێنام ؟!!
ووتی : مه‌ترسه تۆ خێزانی منی !!!( هاوسه‌ری منی !!! ) .
ووتم : چۆن ده‌بمه خێزانی تۆ ، هێشتا نه ماره‌ت برِیوم و نه خوازبینیش له نێوانمان دا رِووی داوه ؟!!
ووتی : به‌م زوانه ماره‌ت ده‌كه‌م .
به‌و حاڵه گه‌رِامه‌وه ماڵه‌وه ، قاچه‌كانم توانای هه‌ڵگرتنی جه‌سته‌میان نه‌بوو . له هه‌ناومدا ئاگرێك ده‌یسوتاندم ، خوایه چیم به خۆم كرد ؟ ئاخۆ من شێت بووم ؟! چیم به سه‌ر هاتووه ؟ هه‌موو دونیا له‌به‌ر چاوم رِه‌ش هه‌ڵگه‌رِا ، ده‌ستم كرد به گریان گریانێكی زۆر به كولڕ وتوند و تالڕ ، باری ژیان و ته‌ندروستیم تا ده‌هات خراپ تر ده‌بوو ، تا گه‌یشته ئه‌و په‌رِی خراپی وه وای لێكردم وازم له خوێندن هێنا . هیچ كه‌سیش له كه‌س و كاره‌كه‌م نه‌یانتوانی هۆكاری ئه‌و بار ودۆخه بزانن كه به سه‌رما هاتووه و تیایدا ده‌ژیم .
به‌ڵام خۆم په‌یوه‌ست كرد به‌و تروسكه ئومێده‌ی كه زۆر جار به خه‌یاڵمدا ده‌هات ، ئه‌ویش ( به‌ڵێن و په‌یمانی ئه‌و كورِه بوو به خواستنم !!!! ) .
رِۆژگار به سه‌ر ده‌چوو به‌ڵام بۆ من قورسترین و تالڕ ترین رِۆژگاری ژیانم بوو ، به لای منه‌وه رِۆژگارێك بوو به قورسی چیایه‌ك قورسایی خستبووه سه‌رم . دوای ئه‌وه چی رِووی دا ؟ ئه‌و رِوداوه له ناكاوه بوو كه هه‌ستی هه‌ژاندم و هه‌موو ژیانمی تێك شكاند ، هه‌موو ئاره‌زووه‌كانی پووچه‌لڕ كرده‌وه . چ رِووداوێك بوو ؟ ئه‌و هه‌ڵوێسته ناشایسه بوو كه له شه‌یتانێك بینیم ، و بووه مایه‌ی شێواندنی ژیانم .
زه‌نگی ته‌له‌فۆنه‌كه لیی دا هه‌ڵم گرت ، گوێم لی بوو ده‌نگی له دووره‌وه ده‌هات ، پێی ووتم : ئه‌مه‌وێ بتبینم بۆ كارێكی گرنگ ، خۆشحالڕ بووم وام هه‌ست كرد ئه‌م كاره گرنگه ئاماده‌كردنی ئیش و كاری ماره‌برِین و خوازبینی كردنی منه ، به‌ڵام كه‌بینیم ده‌م و چاوی نیشانه‌ی توورِه‌ی له سه‌ر دیار بوو .
پێی ووتم : پێش هه‌موو شتێ داواكردن و خواستنی تۆ بۆ من لــه بیر خـۆت به‌ره‌وه !! و به هیچ شێوه‌یه‌ك بیر له‌وه مه‌كه‌ره‌وه رِۆژێك خوازبینیت بكه‌م !! و ببیت به هاوسه‌رم ئه‌مه‌وێ پێكه‌وه بژین وه‌كو ژن و مێردێك به‌ڵام به‌بێ ماره‌برِین و داخوازی !! و... و... هتد.
كه ئه‌م هه‌ڵوێست و ووشه ناشایستانه‌م له‌م كورِه‌وه بیست به‌بێ ئه‌وه‌ی هه‌ست به خۆم بكه‌م ده‌ستم به‌رز بووه‌وه ، و زلله‌یه‌كم له رِومه‌تی دا ، به چه‌شنێك لێمدا وه‌خت بوو بروسكه له چاوانییه‌وه ده‌رپه‌رِێ .
پاشان پێم ووت : وام زانی بانگت كردووم بۆ ئه‌وه‌ی ئه‌و هه‌ڵه‌یه رِاست كه‌یته‌وه كه كردوته ، به‌ڵام به چه‌شنێك بینیتم زۆر جیاواز له‌وه‌ی كه من بیرم لی ده‌كرده‌وه ، به چه‌شنێك ئه‌تبینم پیاوێكیت نه رِه‌وشتت هه‌یه نه ئه‌ده‌ب ، له پیسیشدا هیچ شتێك هاوشانت نییه . به‌ده‌م گریانه‌وه به په‌له له سه‌یاره‌كه‌ی دابه‌زیم .
پێی ووتم : به یارمه‌تیت تۆزێك رِاوه‌سته . بینیم شریتێكی ڤیدیۆی به په‌نجه‌كانی ده‌ستیا هه‌ڵواسیوه و پیشانی منی ئه‌دا ، به ده‌نگێكی به‌رز ووتی : به‌م شریته هه‌موو ژیانت تێك و پێك ده‌شكێنم .
پێم ووت : جا چی له ناو ئه‌و شریته دایه ؟
ووتی : وه‌ره له‌گه‌ڵما بۆ ئه‌وه‌ی به چاوی خۆت بیبینی چی له ناو ئه‌م شریته دایه .
بۆ ئه‌وه‌ی بزانم چی له ناو شریتی ڤیدیۆكه دایه له‌گه‌ڵیا رِۆیشتم كه شریته‌كه‌ی لی دا بینیم هه‌موو ئه‌و تاوان و كرداره ناشایستانه‌ی كه له نێوانماندا به ئه‌نجام گه‌یه‌نراوه به كامێرای ڤیدیۆ گرتوویه‌تی ، به ته‌واوی چیمان كردبوو ئێستا له سه‌ر شاشه‌ی ته‌له‌فزیۆن به چاوی خۆم ده‌یبینم .
پێم ووت : ئه‌وه چ كارێكه كردووته هه‌ی بێ شه‌ره‌ف هه‌ی بێ رِه‌وشت .
ووتی : كامێرای شاراوه‌مان له سه‌ر بووه هه‌موو جوڵه و چركه‌یه‌كی نێوانمانی وێنه گرتووه‌و وا له ناو ئه‌م شریته دایه . ئه‌م شریته‌ش باشترین چه‌كێكه بۆ من ، بۆ ئه‌وه‌ی بتخه‌مه ژێر فه‌رمانه‌كانی خۆم و به پێی فه‌رمانی من هه‌ڵسوكه‌وت بكه‌ی ، ده‌نا به‌م شریته تێكت ده‌شكێنم و دوا رِۆژیشت ده‌سوتێنم .
منیش ده‌ستم كرده گریان و هاوار كردن چونكه كێشه‌كه به ته‌نها كێشه‌ی من نه‌بوو به‌ڵكو كێشه‌ی هه‌موو كه‌س و كاره‌كانمه به تایبه‌تی ماڵوه‌مان .
به‌ڵام ووتی : هه‌رگیز ... لــــه ئه‌نجامدا بووم به دیلی ژێر ده‌ستی ئه‌م كورِه . ئه‌م كورِه‌ش به ئاره‌زووی خۆی چۆنی بوویستایه له پیاوێكه‌وه ده‌یگواستمه‌وه بۆ ژێر ده‌ستی پیاوێكی تر و له گه‌نجێكه‌وه بۆ گه‌نجێكی تر به‌م شێوه‌یه ئه‌م ده‌ست و ئه‌و ده‌ستی به من ده‌كرد ، و پاره‌ی له سه‌رم وه‌ر ده‌گرت . به هه‌ر حالڕ ئه‌م كورِه منی كرده سه‌رچاوه‌ی پاره ده‌ركردنی خۆی ، و رِازی كردنی گه‌نجه شه‌هووه‌ت بازه‌كان ، نه‌شم ده‌وێرا هیچ بڵێم ، كه‌وتمه نێو ژیانی له‌ش فرۆشه‌كان و به یه‌كجاری ماڵئاوایم كرد له ژیانی پاكی و بێگه‌ردی .
تا ئه‌و ساته وه‌خته‌ش كه‌س و كاره‌كه‌م ده‌رباره‌ی ئه‌م رِه‌فتار و كردارانه‌ی من هیچیان نه‌ده‌زانی ، چونكه متمانه‌یان پێم بوو !!! به‌ڵام شریته‌كه‌ش به نێو گه‌نجه‌كاندا بڵاو بووه وه . یه‌كێك له‌و كورِانه‌ی كه شریته‌كه‌ی كه‌وته ده‌ست ئامۆزاكه‌م ( كورِی مامم ) بوو ، به‌م شێوه‌یه‌ش رِوداو و كێشه‌كه‌م ئاشكرا بوو ، باوكم زانی و كه‌س و كاره‌كه‌م به‌م به‌زمه‌ی منیان زانی ، وه ئابرِو چونه‌كه‌ش بڵاو بووه‌وه و گه‌یشته زۆربه‌ی شوێنه‌كانی شار ، ماڵه‌وه و كه‌س و كاره‌كه‌م به‌م كاره‌ی من له‌كه‌دار بوون . منیش بۆ پاراستنی گیانی خۆم هه‌ڵهاتم و خۆم له چاو وون كرد پاشان كه زانیم باوك و خوشكه‌كانم له شه‌رما ماڵیان به‌جێ هێشتووه و هه‌ڵهاتوون بۆ وڵاتێكی تر .
تا وای لی هات هه‌موو كۆمه‌ڵه خه‌ڵك و دانیشتن و باسێكی ئه‌م شاره ده‌بوو باسی ئه‌م حه‌یا چوونه‌ی ئێمه‌ی تیا بكریایه و به‌و شێوه‌یه‌ش شریته‌كه له گه‌نجێكه‌وه ده‌كه‌وته ده‌ست گه‌نجێكی تر ، و بڵاو ده‌بووه‌وه و منیش له نێوان ژیانی بێ عاری و له‌ش فرۆشه‌كاندا ده‌ژیام . وه ئه‌م بێ نرخی بێ رِه‌وشته ، یه‌كه‌م ئاراسته كار بوو كه وه‌ك بووكه شووشه‌یه‌ك چۆنی بویستایه جوڵه‌ی پێده‌كردم و ده‌یجوڵاندمه‌وه ، نه‌شمده‌توانی به ئاره‌زووی خۆم بجوڵێمه‌وه ، وه هه‌مان ئه‌م گه‌نجه بووه‌ته هۆی شێواندن و پارچه پارچه كردنی چه‌ندین خێزانی تر و ماڵی تر ، بووه‌ته هۆی له ده‌ست دان و سووتاندنی دوا رِۆژی چه‌ندین كچی وه‌كو من ، كه له سه‌ره‌تای چرۆ ده‌ركردن و پێگه‌یشتندا بووین بۆیه : برِیارم دا تۆڵه‌ی خۆمی لی بكه‌مه‌وه ، رِۆژێك بوو وه‌ك رِۆژه‌كانی تر كورِه به سه‌رخۆشی خۆی كرده ژووردا و له‌وپه‌رِی سه‌رخۆشی دا بوو ، منیش ئه‌م ساته وه‌خته‌م به‌هه‌ل زانی و چه‌قۆیه‌كم لێدا و به‌م كاره‌م ئه‌و شه‌یتانه‌م كوشت كه له نێو جه‌سته‌ی مرۆڤێكدا خۆی نواندبوو ، خه‌ڵكیشم له شه‌رِی ئه‌و شه‌یتانه رِزگار كرد ، دوا رِۆژی منیش ئه‌وه بوو ، له پشت ده‌رگا داخراوه‌كانی زنداندا خۆم بینییه‌وه . تاڵی و سه‌ر شۆرِی ته‌نهاییم ده‌چه‌شت ، وه ئێستاش په‌شیمانم له‌و كرده‌وه ناشرینانه‌ی كه كردومه وه په‌شیمانیشم له‌و ژیانه‌ی كه‌م ته‌رخه‌میم تیادا كرد .
وه هه‌ر كاتێ شریتی ڤیدیۆم ده‌هاته‌وه یاد وام هه‌ست ده‌كرد له هه‌موو شوێنێك دا كامێراكان به دوامه‌وه‌ن و رِاوم ده‌نێن ، وه ئه‌م چیرۆكه‌ی خۆمم نووسییه‌وه ، بۆ ئه‌وه‌ی هه‌موو كچێك به خوێندنه‌وه‌ی چیرۆكه كه ، په‌ند و ئامۆژگاری لی وه‌رگرێ و ببێته په‌ندێك بۆ ئه‌و كچانه‌ی كه‌وتونه‌ته نێو دنیای سۆزداری و نامه‌ی رِازاوه و دره‌وشاوه به ووشه‌ی سۆزداری ، بۆ ئه‌وه‌ی به نامه و ووشه‌ی جوان و په‌یمانی كورِان خۆش باوه‌رِ نه‌بن ، و جوانترین و رِازاوه‌ترین ووته و ووشه‌ی كورِان به دوژمنی سه‌ره‌كی خۆیان بزانن .
بۆیه : ئاگاداری ته‌له‌فون به خوشكی خۆم ئاگاداری به !
خوشكی حیشمه‌ت و حه‌یا ویستم : خۆ گوێت لی بوو سه‌ر گوزه‌شته‌ی ئه‌م كچه خوێندنه‌وه‌ی چه‌نده به ئازاره ، سه‌ره‌تا قایل نه‌بوو ، پاشان گۆرِانی دڵی و خۆش ویستنی كورِه‌كه پاشان كوشتنی خۆشه‌ویسته‌كه‌ی ، و پاشان له ژووری تاریكی زنداندا خۆی بینییه‌وه !! بۆچی ؟! چونكه خۆشه‌ویسته‌كه‌ی دوژمنی ده‌رچوو !!
| 
